11.05—02.06.2024
Camilla Cerioni, Camilla Sæberg, Galadriel González Romero, Jette Dalsgaard, Julie Sjöfn Gasiglia, Martina Priehodová, Nele Karlotta Berger, Sunneva Ása Weisshappel
Rætur að rekja – hin örþunna íðilrót: Útskriftarsýning MA nema í myndlist
![](https://images.prismic.io/nylistasafnid/ZjT6oUMTzAJOChbg_LHI_Utskrift_2024_MA_Myndlist_Facebook_Event_1920x1005.jpg?auto=format%2Ccompress&rect=2%2C0%2C3996%2C2094&w=1000&h=524)
Listaháskóli er staður þar sem ólíkir hugmyndastraumar mætast, fléttast saman og splúndrast svo í allar áttir, þar sem stöðugleiki og fullvissa eru skoraðar á hólm, leystar upp, vettvangur skoðanaskipta og gagnrýnna samræðna. Útskriftarsýningar listnema eru því mikilvæg uppskeruhátíð andans og gjarnan nokkurskonar púlsmæling á samtímanum.
Rætur að rekja – hin örþunna íðilrót er útskriftarsýning meistaranema í myndlist við Listaháskóla Íslands og er hún sú fjórða sem haldin er í Nýlistasafninu. Átta listamenn sýna útskriftarverkefni sín sem marka lok á tveggja ára námi er felur í sér víðtæka þekkingaröflun og rannsóknir, úrvinnslu á mikilli sjálfsskoðun og dýpkun á listsköpun þeirra. Verk sýningarinnar eiga sér flest undanfara í þeim verkum er listamennirnir sýndu á einkasýningum sínum í sýningasölum Listaháskólans á lokaárinu og gefa góða innsýn inn í hugmyndaheim þeirra.
Sýningarstjóri
Birta Guðjónsdóttir