Í október 2021 kallaði stjórn Nýló eftir umsóknum um þátttöku í Haustsýningu Nýlistasafnsins 2022. Ferlið var með ögn breyttu sniði en áður: Í þetta sinn gafst starfandi myndlistarmönnum færi á að sækja um á forsendum eigin ferlis og listrænnar vinnu, í stað þess að senda inn fullmótaða hugmynd eða fyrirfram skilgreinda tillögu að sýningu. Með þessu var reynt að minnka þá vinnu sem oft fellur á listafólk í umsóknarskrifum, og um leið undirstrika að Nýlistasafnið er vettvangur tilrauna, framsækni og frumsköpunar. Alls bárust 186 umsóknir, sem er metfjöldi. Við þökkum innilega fyrir sýndan áhuga og þátttöku.

Stjórn Nýlistasafnsins valdi í byrjun árs 2022 úr innsendum umsóknum fimm listamenn til að skapa sýningu saman: Þau Graham Wiebe, Minne Kersten, Magnús Sigurðarson, Patricia Carolina og Sigrúnu Hlín Sigurðardóttur. Við óskum þeim innilega til hamingju og hlökkum til að fylgja sýningunni og verkum þeirra úr hlaði í ágúst.