Artistes en Residence er samstarfsverkefni í formi gestavinnustofudvalar, með það markmið að styðja myndlistarmenn með því að veita þeim vinnustað, búsetu og fjárhagsaðstoð. Verkefnið snýst ekki síður um að gefa listamönnum tækifæri til þess að styrkja alþjóðleg tengsl og hvetja til samstarfs á erlendri grundu. 

Eitt af megin markmiðum Artistes en Residence er að skapa rými fyrir tilraunastarfsemi með áherslu á listrannsóknir sem hluta af stúdíóvinnu, og samvinnu mismunandi þátta samtímalistar.

Vinnustofudvölin er samstarfsverkefni Nýlistasafnsins við samtökin Artistes en Résidence í Clermont Ferrand í Frakklandi, franska sendiráðið á Íslandi, Alliance Francaise í Reykjavík og Samband íslenskra myndlistarmanna.

Daglegur kostnaður er innifalinn á meðan dvölinni stendur.. 

Myndlistarmaðurinn Berglind Erna Tryggvadóttir er gestalistamaður í Clermont-Ferrand frá janúar til febrúar 2022 en hún var valin í gegnum opið kall fyrir árið 2022. Í listsköpun sinni skoðar Berglind Erna hversdagsleikann, það að gefur hinu einfalda og hinu mannlega merkingu og vídd sem oft gleymist, með innsetningum og skúlptúrum; þar sem áhersla er lögð á söguna sem hlutur getur sagt. Við spurðum Berglindi út í dvöl hennar og upplifun á vinnustofunni í Frakklandi.    

Hvaða áhrif hefur það haft á listsköpun þína og hugsun að skipta um umhverfi, nánar tiltekið frá Íslandi til Frakklands?

„Ég upplifi ákveðið frelsi, frá amstri hversdagslífsins, til að lifa öðruvísi og rólegra hversdagslífi. Veran í Clermont-Ferrand örvar listsköpun mína; umhverfið og tungumálið, tilraunir mínar til að gera mig skiljanlega út í búð til að fá það sem ég vil á tungumáli sem ég kann ekki alltof vel. Maður skynjar hluti öðruvísi þegar maður er í nýju umhverfi og á stað sem maður hefur engin tengsl við og það er mjög hressandi.“

Hvað gefur vinnustofudvölin þér sem listamanni annað en bara rými?

„Dvölin hérna er mjög gefandi. Ég fæ íbúð til afnota í miðbænum og síðan rými til að vinna í samfélagi listamanna af svæðinu. Ég hef líka fengið mikla aðstoð við allt sem mig hefur langað til að gera hérna, hvort sem að kemur að einhverju sem varðar listsköpun eða bara að kanna svæðið hérna í kring. Isabelle og Bruno, sem starfa hjá Artistes en Résidence, hafa verið mjög hjálpsöm með að koma mér í tengsl við nærumhverfið, í sambandi við ýmislegt sem ég þarfnast fyrir praktíkina mína en einnig almennt að kynnast listamönnum og  heimsækja vinnustofur og slíkt. Andrúmsloftið hérna er mjög vinsamlegt og hvetjandi og minnir að mörgu á Ísland þar sem það er auðvelt og aðgengilegt að finna út úr hlutunum."

Sérðu fyrir þér að dvölin muni hafa áhrif á listsköpun þína í framtíðinni, ef svo þá hvernig?

„Klárlega! Í Frakklandi er ég mjög róleg yfir listsköpun minni og finnst ég einhvern veginn geta einbeitt mér betur að því sem ég vil gera almennt með listinni minni. Ég fæ innblástur af verkum annara listamanna hér og þeirri sérstöðu sem hver og einn býr yfir. Þetta er hugarfar sem ég myndi vilja taka með mér í áframhaldandi vinnu. Ég er líka mjög spennt að halda áfram að efla tengslin sem ég hef þegar myndað við Clermont-Ferrand og listasamfélagið hér, og vona að ég geti haldið áfram að koma hingað“