Kæru fulltrúar!

Við minnum á ársfund Nýlistasafnsins, þriðjudaginn 20. maí kl. 17:00. Fundurinn fer fram í húsakynnum safnsins Marshallhúsinu, Grandagarði 20, 101 Reykjavík. Boðið verður upp á léttar veitingar.

Fundardagskrá

1. Skýrsla stjórnar
2. Ársreikningur 2024
3. Nýir fulltrúar taldir upp
4. Kynning frambjóðenda
5. Kjör stjórnar – kosið er um sæti formanns, fjögur sæti aðalstjórnar og þrjú sæti varastjórnar.

(Hlé - talning atkvæða)

1. Fjárhagsáætlun kynnt og árgjald 2026 ákveðið
2. Niðurstöður kosninga kunngjörðar
3. Önnur mál

Formanns- og stjórnarkosning

Kosið verður um öll sæti stjórnar og varastjórnar: Formann til eins árs, fjögur sæti í aðalstjórn til tveggja ára og þrjú sæti í varastjórn til eins árs. 

Þeir fulltrúar hafa atkvæðisrétt sem greitt hafa ársgjöld fyrir árið 2025. Árgjald safnsins er  4300 kr. og var sent í heimabanka, einnig verður hægt að greiða gjaldið á fundinum, en til þess er gott að mæta tímanlega. 

Þeir meðlimir sem vilja greiða atkvæði en geta af einhverjum ástæðum ekki mætt á fundinn geta kosið símleiðis. Þau hin sömu eru beðin um að senda símanúmer og nafn á nylo(hjá)nylo.is fyrir 20. maí.

Fulltrúum gefst enn tækifæri á að gefa kost á sér í stjórnarsetu, annað hvort með því að senda línu á nylo(hjá)nylo.is eða á fundinum sjálfum.

Hér fyrir neðan má lesa um þau framboð sem hafa nú þegar borist skrifstofu, það eru þrjú framboð í formannssætið, þrjú í aðalstjórn og tvö í varastjórn.

Framboð til formanns:

Heiðar Kári Rannversson
Heiðar Kári Rannversson (f. 1982) er listfræðingur og sýningarstjóri. Hann var deildarstjóri við Nordatlantens Brygge í Kaupmannahöfn 2018-22 og verkefnastjóri fræðslu og viðburða á Listasafni Reykjavíkur 2013-16. Hann hefur verið stundakennari við Listaháskóla Íslands síðan 2015 og sinnt kennslu við Myndlistaskólann í Reykjavík og Háskóla Íslands.

Sem sjálfstætt starfandi sýningarstjóri hefur Heiðar unnið rannsóknar- og sýningarverkefni fyrir m.a. Listasafnið á Akureyri, Listasafn Íslands, Hafnarborg, Gerðarsafn, Myndhöggvarafélagið í Reykjavík, Myndlistarmiðstöð og Nýlistasafnið.

Árið 2014 stýrði hann sýningunni S7 - Suðurgata >> Árbær (ekki á leið), samvinnuverkefni Nýlistasafnsins og Borgarsögusafns Reykjavíkur fyrir Listahátíð í Reykjavík. 2017 vann hann verkefnið YFIRLESTUR – myndlist í bókaformi, tvær sýningar fyrir Nýló í Breiðholti. Heiðar sat í varastjórn frá 2015-17 og var auk þess í hlutastarfi hjá safninu um nokkurra mánaða skeið 2017.

„Ég fór að venja komur mínar í Nýló árið 2008, þegar safnið var á Laugarvegi 26, og heillaðist algjörlega. Gerðist fljótlega fulltrúi, sat í stjórn og vann ýmis verkefni fyrir safnið næstu ár. Nýló hefur haft afgerandi áhrif á starf mitt í þágu myndlistar og sannfært mig um að safnið sé einstakt - ekki aðeins hér á landi heldur líka alþjóðlega. Eftir nokkur ár erlendis vil ég leggja safninu lið á ný sem formaður stjórnar“.

Helena Solveigar Aðalsteinsbur (hán)
Ég býð mig fram sem formann stjórnar Nýlistasafnsins með trú á að listamenn eigi að vera í fyrsta sæti í stefnumótun, sýningarhaldi og framtíðarsýn safnsins. Ég er myndlistarmaður með BA frá LHÍ og MA í sýningarstjórnun frá Central Saint Martins. Með víðtæka reynslu hef ég starfað með virtum stofnunum á borð við Southbank Centre og Hayward Gallery í London, auk þess að leiða grasrótarverkefni á borð við LungA, Laumulistasamsteypuna og sýningar og viðburði m.a. í Kling & Bang og Gerðarsafni.

Ég vil styðja við kraftmikla, skapandi og sjálfstæða sýn Nýlistasafnsins sem vettvangur fyrir tilraunir, þverfaglegar tengingar og listrænt frelsi. Staður þar sem listamenn fá að vaxa, þróa nýja hugmyndir og taka skapandi áhættur. Ég vil stuðla að því að safnið verði staður fyrir nýsköpun með spennandi sýningar í forgrunni. Með reynslu af rekstri, fjármögnun og menningarstjórnun er ég tilbúið að vinna að framtíð safnsins með hagsmuni listafólks að leiðarljósi. Ég flyt heim í sumar og lít á þetta sem einstakt tækifæri til að leggja mitt af mörkum á tímamótum. Ég er alltaf til í samtal um hlutverkið í síma, tölvupósti eða á samfélagsmiðlum! (s: 6981744, helenaadalsteinsdottir@gmail.com og @sunnyson.haha)

Odda Júlía Snorradóttir (hún)

Það er af mikilli ánægju sem ég bíð mig fram til formanns stjórnar Nýlistasafnsin með hagsmuni myndlistarinnar og listamanna fyrir brjósti! Ég hef unnið sem starfsmaður hjá safninu síðastliðin tvö ár, fyrst sem safneignarfulltrúi, síðan framkvæmdarstjóri og nú sem safnstjóri í afleysingu. Starf þetta hefur gefið mér góða innsýn í það einstaka hlutverk sem safnið gegnir í vistkerfi íslenskrar myndlistar og eflt þá trú mína að upprunalegt markmið safnsins eigi enn fullt erindi í dag. Nú vil ég gjarnan láta til mín taka með það að leiðarljósi að Nýló sé vettvangur fyrir listamenn að vinna að sinni myndlist án málamiðlana. Ég vil skapa öruggt umhverfi fyrir tilraunastarfsemi og grósku nýrra strauma í myndlist, rými sem hlúir að listamönnum og hvetur þá til þess að taka áhættur og sem grípur það sem annars á það á hættu að tapast. Ég vil ekki aðeins bjóða nýja strauma velkomna heldur stuðla að virkri leit eftir þeim. 

Ég er með meistaragráðu í sýningargerð frá HÍ og hef tekið að mér fjölbreytt verkefni bæði hérlendis og erlendis. Ég hef meðal annars sýningarstýrt sýningum í Nýló, Norrænahúsinu, Hafnarborg og Rúmeníu. Ég hef góða reynslu af alþjóðlegu samstarfi, meðal annars í gegn um Sequences og starfa nú sem framkvæmdarstjóri hátíðarinnar. Ég er einn stofnenda Íslenska Teiknisetursins sem rannsakar og sýnir teikningu í íslenskri myndlist.

Framboð til Aðalstjórnar:

Anna Andrea Winther
Anna Andrea Winther (f. 1993) býr og starfar í Reykjavík. Hún hlaut MFA gráðu í myndlist frá Glasgow School of Art árið 2022 og BA gráðu í myndlist frá Listaháskóla Íslands árið 2018. Anna mun útskrifast með leyfisbréf kennara frá Háskóla Íslands í sumar. Hún hefur starfað sjálfstætt sem myndlistamaður og sinnt fjölbreyttum verkefnum á sviði myndlistar síðan hún útskrifaðist árið 2018. Hún vinnur mikið í samstarfi með öðrum listamönnum og vinnur með börnum og ungmennum samhliða listinni. Hún hefur setið í varastjórn Nýlistasafnsins í eitt ár og gefur nú kost á sér í stjórn safnsins.

Joe Keys
Ég hef setið í stjórn Nýló síðastliðin tvö ár. Ég hef notið stjórnarsetu minnar innilega en hún hefur gefið mér tækifæri til þess að vinna að fjölmörgum sýningarverkefnum og kynnast safneigninni nánar. Ég hef ástríðu fyrir Íslenskri samtíma myndlist sem og eldri verkum og myndi glaður halda áfram sem stjórnarmeðlimur.  

Sadie Cook
Sadie Cook (f. 1997) hefur birt of sýnt á Íslandi sem og erlendis, meðal nýlegra verkefna er væntanleg sýning háns og Jo Pawlowska í Hafnarhúsinu. Ljósmyndir eftir Sadie má finna í bókum MOMA safnsins, Tate og Met. Hán hefur komið inn sem gestadómari í Yale, Harvard og NYU. Sadie útskrifaðist frá Yale árið 2020 og fékk Fullbright styrk árið 2021 til þess að koma til Íslands. Hán hefur búið á Íslandi síðan þá og býr með Diljá, maka sínum. Sadie rekur Gallery Kannski og situr í varastjórn Nýlistasafnsins.

Hán hefur notið þess að sitja í stjórn. Hán vill gefa baka til samfélagsins og sýningarrýmisins sem Nýló er sem hán telur mjög mikilvægt. Hán hefur reynslu af uppsetningu, smíðavinnu og því að skrifa styrkumsóknir.

Framboð til varastjórnar:

Deepa Iyengar
Ég hef setið í stjórn Nýló síðan 2023 og sækist nú eftir stöðu varamanns. Ég er nú þegar fulltrúi Nýló í stjórn Sequences 2025 og er einn sýningastjóra myndlistarsýningar íslenskra heyrnarlausra listamanna sem fer fram 2026.

Ég hef lagt mig fram um, og mun halda áfram, að tala fyrir því að listamenn úr jaðarhópum verði fyrir valinu hjá Nýló. Á sama tíma hef ég lært að meta hlutverk stjórnarinnar við að styðja tækifæri sem snúast um að dýpka skilning á safneign Nýló til að víkka sýnina á listasögu íslenskrar samtímalistar. Að samræma þessi tvö verkefni er spennandi áskorun.

Sigríður Regína Sigurþórsdóttir
Ég býð mig fram til áframhaldandi setu í varastjórn Nýlistasafnsins. Ég hef tekið þátt í starfi safnsins í um fimm ár, fyrst við aðstoð í safneigninni, síðan sem safneignarfulltrúi frá 2022-2024 og loks í varastjórn. Ég er sérfræðingur í varðveislu nýmiðla og er nú í doktorsnámi í listfræði við HÍ. Mér er annt um safneign Nýló og þátttaka í mótun listrænnar stefnu og öflugu sýningarstarfi hefur verið mér gefandi. Ég legg hart að mér fyrir safnið, þakka fyrir það traust sem mér hefur verið sýnt hingað til og vonast til að fá að halda áfram að móta stefnu og starf safnsins.

Fráfarandi stjórn:
Sunna Ástþórsdóttir - formaður
Guðlaug Mía Eyþórsdóttir- varaformaður
Joe Keys - gjaldkeri
Deepa Iyengar - ritari
Lukas Bury - meðstjórnandi

Fráfarandi varastjórn
Anna Andrea Winther
Sadie Cook
Sigríður Regína Sigurþórsdóttir

Skv. 6. gr. í skipulagsskrá ræður stjórn Nýlistasafnsins einstakling sem er ábyrgur fyrir starfsemi safnsins í fullt starf eða hlutastarf, svo og annað starfsfólk. Kjörin stjórn mun því huga að vali og ráðningu nýs safnstjóra í kjölfar ársfundar.

Allir fulltrúar hjartanlega velkomnir!

Mynd með frétt frá sýningu Claudiu Hausfeld ANTECHAMBER. Ljósmynd eftir Sister Lumière.