Leiðangurinn_1

Nýlistasafnið býður ykkur innilega velkomin á sýningu Leiðangursins á Töfrafjallið, mánudaginn 21. ágúst, á nýju tungli, milli klukkan 18:00 – 20:00.

Leiðangurinn á Töfrafjallið (2013-2020)* er tilraun með tíma og rúm sem kannar skynjun, þekkingu og vitundarsvið, fyrr og nú. Við viljum líta út fyrir mörk okkar sjálfhverfu tilvistarskilyrða, og samtímis viðurkenna og horfast í augu við öfl sköpunar og eyðileggingar í fortíð og samtíð.

Við nálgumst þau með aðferðum myndlistar, bókmennta, samræðna, athafna. Við yfirgefum sviðið og erum þar samt, leitum og finnumst innan þess og utan. Við skynjum verkefnið í senn sem getnað og fæðingu margbrotins huga; verk einstaklinga renna saman og flæða í tímabundnu rými reynslunnar. Við gröfum upp eyðiland neytendans, sem sífellt neytir í skorti og endalausri þörf fyrir meira þar sem ekkert meira er að hafa.

Leiðangurinn snýst um skynjun á evrópskri samtímamenningu í tengslum við skáldsöguna Töfrafjallið eftir Thomas Mann og um leið mótast hann af túlkun á stöðu eyjunnar Íslands í evrópskri menningu og sögu. Skáldsagan er endalaus könnun á mannlegri tilvist og bergmálar uppdráttarsýki evrópskrar menningar fyrir styrjaldirnar miklu í öræfum eyðilands auðhyggju samtímans.

Í október 2013 fór leiðangurinn í könnunarleiðangur frá jaðri Evrópu til sögusviðs skáldsögunnar. Hópurinn dvaldi á Berghotel Schatzalp í Davos sem er eitt af fyrrum berklahælum staðarins og talið er að Mann hafi nýtt sé til að lýsa Berghof-hælinu í sögunni. Hótelið var tómt meðan hópurinn dvaldi þar og skráði hughrif sín, skynjanir og samtöl í máli og myndum, kvikum sem kyrrum.

Leiðangurinn stendur yfir til vorsins 2020, með sýningum og gjörningum sem haldin verða í galleríum og öðrum stöðum á Íslandi og meginlandi Evrópu. Lokaniðurstöður verða birtar í bók sem inniheldur greinar, brot og listaverk. Leiðangurinn stefnir einnig að útgáfu fyrstu íslensku þýðingarinnar á Töfrafjallinu haustið 2020.

Í tengslum við sýninguna í Nýlistasafninu mun leiðangurinn standa fyrir eftirfarandi atburðum:

Fimmtudaginn 7. september kl. 20:00 – Listamaðurinn sem miðill.

Fimmtudaginn 14. september kl. 20:00 – Kortagerð og þýðingar.

Fimmtudaginn 21. september kl. 20:00 – Tónlist af Töfrafjalli.

*Leiðangursfélagar eru Ása Helga Hjörleifsdóttir, Birna Bjarnadóttir, Gauti Kristmannsson, Haraldur Jónsson, Karlotta Blöndal, Steingrímur Eyfjörð og Unnar Örn J. Auðarson.

Verkefnið er styrkt af Myndlistarsjóði, Hótel Holt, Seglagerðinni Ægi, Neskirkju, Háskóla Íslands, Eimskip, Epal, Slippfélaginu, Haugen gruppen ehf.