Nýlistasafnið kynnir með gleði sýningu Joan Jonas – Does the Mirror Make the Picture, í Nýlistasafninu, föstudaginn 6. október á Sequences myndlistarhátíð.

Joan Jonas er heiðurslistamaður Sequences myndlistarhátíða sem haldin verður í áttunda sinn í ár, víðsvegar um Reykjavík.

Síðan á sjötta áratugnum hefur Joan Jonas (f. 1936, New York) skapað nýstárleg verk í marga miðla, sem rannsaka tímatengt skipulag og pólitískt mikilvægi áhorfandans. Í verkum sínum blandar hún saman leikhúsi, dansi, hljóði, texta, teikningum, skúlptúr og vídeó/myndvörpun. Stoðir þeirra eru flöktandi sjálfsmyndir, frásagnartákn og -þræðir sem hafna þó línuleika fyrir hina tvíræðu og brotakenndu sögu.

Jonas er frumkvöðull á sviði vídeólistar. Hún notaði Portapak kvikmyndavélar árið 1970 til að kanna tilfærsluna frá myndavélinni til vörpuninnar yfir á líkamann og í hið lifandi rými. Í nýrri vídeóverkum, gjörningum og innsetningum hefur Jonas oft starfað með tónlistarmönnum og dönsurum, ásamt því að leita til bókmennta og goðsagna í marglaga rannsóknarvinnu sinni.

Á sýningu Jonas í Nýlistasafninu mun hún sýna úrval verka frá mismunandi tímabilum ferils hennar – allt frá fyrstu vídeóverkum hennar Wind (1968) og Song Delay (1973) til nýrra verka stream or river or flight or pattern (2016/2017), sem hún vann á nýlegum ferðum sínum um Feneyjar, Singapore, Nova Scotia og Víetnam.

Jonas mun einnig flytja gjörning í Tjarnarbíói sunnudaginn 8. október, í samstarfi við Maríu Huld Markan, tónskáld og tónlistarmann. Hægt er að nálgast miða hér á www.tix.is

Sequences myndlistarhátíð er tíu daga tvíæringur sem haldin er í Reykjavík dagana 6.–15. október 2017. Hátíðin í ár kynnir með stolti verk eftir tuttugu og einn innlenda og erlenda listamenn. Þetta verður í áttunda sinn sem Sequences hátíðin er haldin

Sýningarstjóri Sequences VIII er Margot Norton, sýningarstjóri við New Museum í New York.

Mynd: Joan Jonas, Song Delay, 1973, stilla úr kvikmynd. © 2017 Joan Jonas / Artists Rights Society (ARS), New York.

Miðja Sequences VIII verður í Marshallhúsinu, heimkynnum Kling & Bang og Nýlistasafnsins.

Hátíðin mun einnig fara fram í öðrum listamannareknum rýmum og listastofnunum á höfuðborgarsvæðinu.

Til viðbótar við aðaldagskrá hátíðarinnar verður fjölbreytt utandagskrá víðsvegar um borgina.

Skipuleggjendur:
Nýlistasafnið, Kling & Bang og Kynningarmiðstöð íslenskrar myndlistar standa að Sequences. Í ár stýrir Margot Norton, sýningarstjóri The New Museum í NYC, hátíðinni í samvinnu við Eddu Kristínu Sigurjónsdóttur, ásamt meðlimum stjórnar Sequences.

Bakhjarlar:
Sequences nýtur stuðnings Myndlistarsjóðs, Reykjavíkurborgar, Promote Iceland, Iceland Naturally og hinnar alltumlykjandi, orkumiklu samvinnu listamanna!